145 Aldiz ikusita, 1 gaur
Sopelako Udalak soinu gailu berriak jarri ditu udalerriko hainbat semaforotan, ikusmen urritasuna duten pertsonen irisgarritasuna eta segurtasuna hobetzeko asmoz.
Instalatutako sistemak LED optika tradizionalaren ordez, oinezkoen argi-seinale berdearekin batera doan laguntza-sistema akustiko bat du. Mekanismo hori, sakagailu bidez, haririk gabeko urrutiko agintearen bitartez edo Bluetooth-a aktibatuta duen telefono mugikorraren bidez aktiba daiteke.
Sistemak Bluetooth-a aktibatuta duen telefono mugikor bat detektatzen duenean oinezkoen pasabidera hurbiltzen, lokalizazio-tonu leun bat emititzen du gailua ezagutzen ari dela adierazteko. Une horretatik aurrera, seinale akustiko desberdinek semaforoaren egoeraren berri ematen dute, eta erabiltzaileak orientatzen laguntzen dute.
Oinezkoen semaforoa berde jartzen denean, esaterako, soinua bizia eta aldizkakoa izango da, gurutzatzea segurua dela adieraziz. Argi berdea dir-dir egiten hasten denean, berriz, sistemak tonu azkarragoak eta aldizkakoagoak igorriko ditu igarotze-denbora amaitzear dagoela ohartarazteko.
Sistema hori beharrezkoa denean soilik aktibatzen da, eta, horri esker, ikusmen urritasuna duten pertsonen autonomia hobetzen da, etengabeko zaratarik sortu gabe eta kutsadura akustikoa murriztuz.
Unai del Burgo alkateordearen hitzetan: “Herrian, irisgarritasun integrala bermatzea da gure helburua, eta, bide horretan, pauso garrantzitsua da semaforo bidezko pasabideetan halako gailuak instalatzea”.