224 Aldiz ikusita, 4 gaur
Ekainaren 25etik 29ra izango dira Sopelako San Pedro jaiak; uztailaren 15etik 19ra, Larrabasterrako Karmen jaiak; eta, amaitzeko, uztailaren 20an, Santa Marina eguna ospatuko da
Hamar egun eskas falta dira Sopelako San Pedro jaiak abiatzeko: ekainaren 25etik 29ra ospatuko dira aurten. Umeentzako jarduerak, kontzertuak, herri bazkaria, adineko pertsonen omenezko bazkaria, pilota txapelketa, erakustaldiak, bertso saioa eta dantza plaza egongo dira, beste kontu askoren artean.
Ekainaren 25ean, jaien hasiera egunarekin batera, kuadrillen jaitsiera egingo da: 19:00etan abiatuko da Eleizalde kaletik, fanfarriak lagunduta, eta Udaletxeko berdegunean erakustaldia egingo dute. Haren ondotik, pregoia eta txupinaren jaurtiketa egingo dira, jaiei hasiera ofiziala emanez. Aurten, Sopelako Kuadrillek 15 urte bete dituztenez, eurak izango dira pregoia jaurtitzeko ohorea izango dutenak. Herriko jai giroa eta parte hartzea sustatzen egindako ibilbidea aitortu nahi izan zaie. Txupina, berriz, Azkena eta Etxera kuadrillak botako du, iazko Kuadrillen probetako irabazleak izateagatik.
Hurrengo egunetan ere, udalerriko kaleak, plazak eta txokoak bizitzaz eta giroz beteko dituzten proposamenez beteta egongo dira. Kale antzerkia, dantza, animazioa, zirkua, musika eta bestelako ekintzak izango dira nagusi.
San Pedro jaiak amaitu ostean, Larrabasterrako Karmen jaiak etorriko dira segidan: uztailaren 15etik 19ra egingo dituzte aurten. Kiribile Eraztun Berdearen aldeko elkartea izango da aurtengo pregoilaria. Jaiei amaiera emateko, uztailaren 20an, Santa Marina eguna ospatuko da.
Lankidetza ardatz
Aurten, tokiko talentuaren protagonismoa inoiz baino indartsuagoa izango da. Espiritu kolektibo horren isla gisa, “Gaur da gure eguna” aurkeztuko da, Sopelako jaietako abestiaren moldaketa berria. 2012ko jatorrizko bertsiotik abiatuta, Musika Eskolako elkarteek, musikariek, abesbatzek eta ikasleek euren ahots eta instrumentuak batu dituzte nortasunez eta sentimenduz betetako grabazio batean. Bertakoaren aldeko apustu hori, gainera, tokiko musika taldeen parte hartzearekin indartzen da, baita Sopelako artisten kontratazioarekin ere,esate baterako: Xabi Aburruzaga, Meñakoz Dantza Taldea, Eguzkilore Dantza Taldea, Gorka Granado (Makilhots), Aitzol Iraola eta Libe Urrutia (Nonbait eta Zinema Paradise) eta Rise To Fall taldearen kontratazioarekin.
Jaietako programazio osoa osatzeko, elkarlana sustatu da herriko elkarteekin zein ostalariekin, egitarauaren barruan, jarduera ugari antolatu baitituzte, jaiak dibertsitatez, partaidetzaz eta bizitzaz betetzeko.
Helburua argia da: jai herrikoiak, parte hartzaileak, euskaldunak eta parekideak bermatzea. Udalak eta Jai Batzordeak herritar eta bisitari guztiak gonbidatu nahi ditu jaiak euskaraz, berdintasunean, errespetuz eta modu jasangarrian gozatzera: guztion artean jai seguruak, garbiak eta abegikorrak lor ditzakegu.
Kontsultatu hemen jaietako egitarau osoa.