104 Aldiz ikusita, 1 gaur
Sugarri eta Sopelako Sare feministaren arabera, “Euskal Herrian gaur egun dagoen zaintza eredua zalantzan jartzen ari gara. Zaintza sistema publiko komunitario baten beharra aldarrikatuz eta pribatizazioa salatzen jarraitzen dugu. Sistema arrazista desegiteko aliantzak egiten ari gara. Azken urteetan, mugimendu feministak emakumeon bizitza duinen aldeko estrategia jarri du mahai gainean”. Izan ere, “borroka feministak beharrezkoa izaten jarraitzen du, emakumeok aukera eta eskubideetan berdintasuna izan arte, gure jatorria kontutan izan gabe”.
Gaur martxoaren 8an Larrabasterrako Urgitxieta plazan elkartzeko deia egin du Sopelako mugimendu feministak, goizeko 10.30etan. Herriko elkarte zein hezkuntza eragileen elkarretaratzea antolatu dute eta bertan manifestoen irakurketez gain, Arima dantza taldeko koreografia ere izango da. “Aurreko urteetan bezalaxe, beste behin elkartzen gara gaurko egunean, gure artean ez daudenen alde borrokan, erailak izan zirenen alde. Erailak bere askatasuna eta duintasuna defendatzeagatik”.
Emakumeen nazioarteko egun honetan, beharrezkoa da ere gure gizarteak historian zehar eraldaketa feministak eragin dituzten emakumeen belaunaldiekiko zorra aitortzea, bai genero-agindu eta genero-estereotipoen aurkako erresistentzietan, bai mugimendu feministaren borroka kolektiboetan.
Horrela, Sopelako Udalak arreta jarri du adineko emakumeen egungo belaunaldian, sistematikoki estereotipatua eta diskriminatua den belaunaldi horretan, sozialki garrantzirik gabekoa bihurtu duten horretan. Martxoaren 8an, emakumeen nazioarteko eguna dela eta, Udalak eskura dituen estrategia eta mekanismo guztiak sustatu behar ditu, genealogia feminista ikusarazteko eta emakumeekin historian izandako ahanzturak konpontzeko.
Eta historia orainean ere gauzatzen denez, Sopelako Udalak Sugarrik eta Sopelako Sare feministak Udaletxe plazatik 19:30etatik aurrera deitutako manifestazioarekin bat egiteko gonbitea luzatzen die herritar guztiei.
“Indar guztiak batuz, gurekin bat egin, horrela gehiago eta indartsuagoak izango gara! Gora borroka feminista!”
2024ko martxoaren 8rako Adierazpena
Emakumeen nazioarteko egun honetan, bidezkoa da gure gizarteak historian zehar eraldaketa feministak eragin dituzten emakumeen belaunaldiekiko zorra aitortzea, bai genero-agindu eta genero-estereotipoen aurkako erresistentzietan, bai mugimendu feministaren borroka kolektiboetan.
Sistema patriarkalak emakumeen ideiak ikusezin bihurtu ditu eta haien aktibismo politiko eta soziala ukatu ditu, beraien aldarrikapenak isilaraziz eta komunitateen aldeko lorpenen ebidentziak ezabatuz. Gainera, sistematikoki ezkutatu dira jatorri eta tradizio kultural desberdinetako emakumeen, emakume arrazializatuen, lesbianen, dibertsitate funtzionala duten emakumeen eta adineko emakumeen ekarpenak.
Zehazki, arreta jartzen dugu adineko emakumeen egungo belaunaldian, sistematikoki estereotipatua eta diskriminatua den belaunaldi horretan, sozialki garrantzirik gabekoa bihurtu duten horretan. Gainera, ikusezintasun hori ahulezia handiagoko egoerak ezkutatzen ari da, hala nola prekarietatea eta pobretzea, nahi ez den bakardadea, osasun-arazoak eta indarkeria matxista motak.
Emakumeen ahalduntze-prozesuak tradizio teoriko, politiko eta filosofiko feminista baten oinordekotzat hartzea eskatzen du. Horregatik, adineko emakumeek dituzten jakinduriak eta errealitatearen ikuspegi kritikoa balioestea lagungarria da memoria historikoa erreparatzeko. Konponketa horrek aukera ematen digu gure aurreko emakumeak ezagutzeko eta iragana, oraina eta etorkizuna lotuko dituen belaunaldien arteko transmisioa bermatzeko.
Martxoaren 8an, emakumeen nazioarteko eguna dela eta, erakunde ezberdinek eskura ditugun estrategia eta mekanismo guztiak sustatu behar ditugu, genealogia feminista ikusarazteko eta emakumeekin historian izandako ahanzturak konpontzeko.
Udalok, herritarrengandik hurbilen dauden erakundeak garenez, aukera eta ardura dugu, toki-eremuan, emakumeen belaunaldien historia berreskuratzeko eta emakumeek eta borroka feministek udalerrien bizitzari eman dioten balioa aitortzeko, adineko emakumeen egungo belaunalditik hasita. Beraz, Sopelako Udalak konpromiso hauek hartzen ditu:
- Emakumeen memoria historikoa aitortu eta berreskuratuko duten proiektuak garatzea, genealogia sortzeko, hurbileko erreferenteetatik hasi eta tokiko bizitzan eragina izan duten talde feministetaraino.
- Une historiko bakoitzean, tradizio eta ingurune kultural guztietan, sistemarekiko erresistentzia eta erantzuna artikulatu duten mugimendu feministak aintzatesten laguntzea.
- Ezagutzak eta esperientziak trukatzeko belaunaldien arteko topaketa- eta elkarrizketa-guneak babestea, ahalduntze feministarako eta adin eta baldintza desberdinetako emakumeen aliantzarako guneak izan daitezen.
- Emakumeen ikusgarritasun soziala sustatzeaikuspegi intersekzionalaz, bereziki, adineko emakumeena, bere aniztasun osoan, eta emakumeen zahartzaroari buruz , gizartean, nagusi den irudia eraldatuz, adinean eta estereotipoetan oinarrituta.
- Adineko emakumeek esparru publikoan dituzten esperientzietan eta harreman- eta partaidetza-moduetan arreta berezia jarriko duten proiektuak bultzatzea, haien aniztasun osoan.
- Errenta baxuenak dituzten adineko emakumeei, bereziki alargunei, ahalduntze ekonomikoa bermatuko dieten diru-sarreren eta pentsioen eskaera babestea, eskumena duten erakundeen aurrean, eta konpentsazio-neurriak aztertu eta artikulatzea.
- Adineko emakumeentzat, bereziki alargunentzat, dauden laguntza eta prestazio ekonomikoak ezagutaraztea.
- Udal-eskumeneko laguntza- eta zaintza-zerbitzu publikoak indartzea beren herrietan, adineko emakumeei autonomia eta aktibismoa mantentzea ahalbidetzeko.
- Adineko emakumeen aurkako indarkeria matxistaren eragina eta hura gauzatzeko moduak ikertzea eta horietan sakontzea, emakume horien errealitatera eta beharretara egokitutako erantzunak artikulatzeko.
- BERDINSAREA sarearen bidez, EUDELen eta Emakunderen laguntzarekin, udalerriak emakumeen tokiko memoria berreskuratzeko abian jartzen ari diren ekimenak ezagutaraztea eta ikusaraztea.