152 Aldiz ikusita, 1 gaur
- Sopelan Visesaren babes publikoko 33 etxebizitzaren sustapena Eraiki Label zigilua duen lehen eraikin ziurtatua da; horrek eraikuntza industrializatuaren irizpideen arabera diseinatu eta gauzatu dela egiaztatzen du
- Jardunaldia eraikinean bertan egin da, eta bertan bildu dira erakundeetako ordezkariak, enpresa sustatzaileak, eraikuntza-enpresak eta Euskal Autonomia Erkidegoko eraikuntzaren industrializazio-ekosistemaren eragileak
- EraikiHUBk —Eusko Jaurlaritzako Etxebizitza Sailak bultzatua, BUILD:INN eta Teknaliarekin batera— azeleratzaile gisa jarduten du eraikuntza industrializatua Euskal Autonomia Erkidegoan produkzio-eredu berri gisa sendotzeko
Ostiral honetan, Eusko Jaurlaritzako Etxebizitza eta Hiri Agendako sailburu Denis Itxaso, Euskal Autonomia Erkidegoan egindako EraikiHUBen aurkezpenean eta lehen Eraiki Label ziurtagiria emateko ekitaldian izan da; hori guztia Visesak Sopelan dituen babes publikoko 33 etxebizitzen sustapenean egin da. Duela gutxi egindako eraikinak % 90 inguruko industrializazio-maila lortu du, eta zigilu hori jasotzen duen lehena da. Zigilu horrek egiaztatzen du etxebizitza eraikuntza-eredu industrializatuaren estandarren arabera diseinatu eta gauzatu dela. Jardunaldiak Unai del Burgo Sopelako jarduneko alkatea, Eusko Jaurlaritzako ordezkariak, enpresa sustatzaile eta eraikitzaileak, zentro teknologikoak eta industrializazio-ekosistemako eragileak bildu ditu eraikinean bertan, EraikiHUBren sustapena eta hedapena ahalbidetu duen baterako lanari balioa emanez.
“Etxebizitzaren arazoa herritarren kezka nagusietakoa bat da, batez ere Sopelan. Eragile guztiok ausardia behar dugu larrialdi sozial honi aurre egiteko. Erronka handia daukagu aurrean eta erantzun berritzaileak eman behar ditugu, bai teknikoki bai sozialki ere. Horretarako, administrazio guztien erantzunkizun partekatua eta lankidetza beharrezkoak dira. Sopelako Udala elkarlanerako konpromiso horretan berresten da, eta emaitza positiboa begi bistakoa da Asuko etxebizitza publikoko sustapen berri honetan”, adierazi du irekiera instituzionalean Unai del Burgo jarduneko alkateak.
Denis Itxaso sailburuak, bere aldetik, azpimarratu du eraikuntzaren industrializazioa dela etxebizitza eskuratzeko erronkari erantzuteko palanka estrategikoetako bat. “EraikiHUBrekin eta lehen Eraiki Label ziurtagiriarekin erakutsi nahi dugu eraikuntza industrializatua ez dela helburu bat, Euskal Autonomia Erkidegoan dagoeneko kalitatezko etxebizitzak eraikitzen ari den errealitate bat baizik”, nabarmendu du Itxasok.
Lehen Eraiki Label ziurtagiria
Eraiki Label ziurtagiria Tecnaliak aurkeztu du. Tresna horrek proiektu industrializatuetarako estandar tekniko komunak ezartzen ditu, eta etxebizitzak industria-produkzioaren, elkarreragingarritasunaren eta trazabilitate digitalaren irizpideen arabera diseinatu eta gauzatu direla baliozkotzen du. Ziurtagiriaren helburua da, gainera, merkatuan konfiantza sortzea, inbertitzaileentzako eta finantza-erakundeentzako arriskuak murriztea eta eraikuntza-sistema industrializatuetan oinarritutako proiektuen finantzaketa erraztea.
Lehen ziurtagiria emateko ekitaldian Sopelako sustapena ahalbidetu duten hiru eragileak bildu dira: Visesa sustatzaile gisa, Carlos Quindosek ordezkatuta; Viuda de Sainz eraikuntza-enpresa; eta proiektu-taldea. Ziurtagiriaren bidez aitortzen da guztiek batera lan egin dutela eredu industrializatuaren baldintzak betetzen dituen eraikin bat egiteko.
Sustapenaren aurkezpen zehatza Visesako Arlo Teknikoko zuzendari Nerea Morgado Juezek egin du, eta eraikinaren eraikuntza-ezaugarriak eta aplikatutako industrializazio-prozesua azaldu ditu.
EraikiHUB eta bere ibilbide-orria
BUILD:INNeko zuzendari nagusi Marta Epelde Merinok aurkeztu du EraikiHUB, eta azeleratzailearen eredua eta ibilbide-orria azaldu ditu. Ekimena sektore anitzeko lankidetza-azpiegitura bat da, eraikuntzaren euskal ekosistemaren gaitasun industrialak, teknologikoak eta arautzaileak lerrokatzera bideratua, industrializazioak Euskal Autonomia Erkidegoan eskalatu ahal izateko beharrezko baldintzak sortzeko helburuarekin.
EraikiHUBren ibilbide-orriak hamaika jarduketa-ildo aurreikusten ditu 2026 – 2030 aldirako; horien artean, nabarmentzekoak dira Eraiki Label zigiluaren hedapena, eraikuntza industrializatuari lotutako profil profesional berriak sortzeko prestakuntza-programa espezializatuak, eta proiektu industrializatuetarako administrazio-prozedura bizkorrak bultzatzea.
Eraikal programa eta kasu arrakastatsuak
Jardunaldian, Eraikal—eraikuntza industrializatua sustatzeko Eusko Jaurlaritzaren tresna— programaren aurkezpena egin da, Eraikuntzaren Arkitektura, Araudi eta Kalitate Kontroleko Zerbitzuaren arduradun Lourdes González Garridoren eskutik. Bertan, programaren bilakaera, emaitzak eta onuradun berriak errepasatu ditu.
Programa arrakastatsu gisa, Urbanbat-eko Gorka Fernández Oleak Kabian-en esperientzia aurkeztu du, eraikuntza industrializatua epeetan, kostuetan eta kalitatean emaitza zehatzak dituzten benetako proiektuetara nola eraman daitekeen erakusten duen proiektua.
Jardunaldian, halaber, Levantes proiektua aurkeztu du Alokabideko Aitor Pradobosque Cañasek, Euskal Autonomia Erkidegoan finkatzen ari den proiektu industrializatuen ekosistema gero eta handiagoaren erakusgarri.
Etxebizitzen eraikuntza bizkortzeko eredu bat
EraikiHUB unean uneko erronka sozial eta ekonomiko nagusietako bati erantzuteko sortu da: etxebizitza merkeagoa, efizienteagoa eta jasangarriagoa sortzeko beharrari erantzuteko. Eredu industrializatuak aukera ematen du etxebizitza-sustapenen egikaritze-epeak % 50eraino murrizteko, akatsak eta gainkostuak murrizteko eta proiektuen finantza-aurreikusgarritasuna hobetzeko, eta, aldi berean, hondakinak eta isuriak murrizten ditu, diseinuaren hasierako faseetatik jasangarritasun-irizpideak integratuz.
Jardunaldiari amaiera emateko, Eusko Jaurlaritzako Etxebizitza, Lurzoru eta Arkitekturarako zuzendari Pablo Garcia Astrainek azpimarratu du garrantzitsua dela erakundeen, enpresen eta eragile teknologikoen arteko lankidetza indartzea, etxebizitza eskuratzeko erronkari erantzuteko gai den ekosistema industriala sendotzeko.
EraikiHUB martxan jartzearekin eta lehen Eraiki Label ziurtagiria entregatzearekin batera, Euskal Autonomia Erkidegoak urrats zehatz eta egiaztagarria egin du eraikuntzaren industrializazioaren aldeko apustuan, etorkizunerako ekoizpen-eredu gisa.
EraikiHUB-i buruz
EraikiHUB Euskal Autonomia Erkidegoko eraikuntza industrializatuko azeleratzailea da, Eusko Jaurlaritzako Etxebizitza eta Hiri Agenda Sailak sustatua, BUILD:INN klusterrarekin eta Tecnaliarekin batera. Helburua da Euskal Autonomia Erkidegoan eraikuntzaren industrializazioak gora egin dezan beharrezkoak diren baldintzak sortzea, administrazioak, enpresak, zentro teknologikoak eta prestakuntza-eragileak biltzen dituen ekosistema bat eratuz.